दहा जून दिस । नेत्रदान दिन ।
करू नेत्रदान । पुण्य कर्म ॥
नेत्रदान एक श्रेष्ठदान आहे. या दानामुळे मृत्यूनंतरही आपण कोणाचे तरी अंधारमय जीवन प्रकाशमय करू शकतो. अंध व्यक्तीला दृष्टी देऊन त्यांना जग बघण्याची आणि सामान्य जीवन जगण्याची संधी उपलब्ध करून देऊ शकतो.नेत्रदान केल्याने दोन अंध व्यक्तींना दृष्टी मिळते आणि त्यांचे जीवन प्रकाशमान होते. यामुळे त्यांना जग पाहता येते, स्वतःची कामे करता येतात आणि समाजाचा एक अविभाज्य भाग बनून जगता येते.
नेत्रदान हे एक मोठे सामाजिक योगदान आहे. यामुळे समाजात अंधत्वाचे प्रमाण कमी होण्यास मदत होते.दृष्टीदान करणे ही मानवतेची सेवा होय.हे एक निस्वार्थ सेवाकार्यच आहे. यातून आपण माणुसकीची आणि मानवतेची खरी सेवा करत असतो.
मृत्यूनंतरही आपले डोळे जिवंत राहून दुसऱ्यांना जग पाहण्यास मदत करतात, ही एक खूप सकारात्मक बाब आहे.
कोणत्याही वयाची व्यक्ती नेत्रदान करू शकते. मधुमेह, उच्च रक्तदाब, चष्मा किंवा मोतीबिंदू शस्त्रक्रिया झालेल्या व्यक्तीही नेत्रदान करू शकतात.
पण एड्स, हिपॅटायटिस बी किंवा सी, रक्ताचा कर्करोग (ल्यूकेमिया), मेंदूज्वर (एन्सेफलायटिस) यासारख्या आजारांनी ग्रस्त व्यक्ती नेत्रदान करू शकत नाहीत.
व्यक्तीच्या मृत्यूनंतर 6 ते 8 तासांच्या आत नेत्रदान केले जाऊ शकते. यासाठी घरातील सदस्यांनी त्वरित जवळच्या नेत्रपेढीशी (Eye Bank) संपर्क साधणे महत्त्वाचे आहे.
नेत्रदान करताना डोळ्यांच्या बुबुळांचा (Cornea) भागच काढला जातो. यामध्ये संपूर्ण डोळा काढला जात नाही. ही प्रक्रिया पूर्णपणे सुरक्षित असते आणि चेहरा विद्रूप होत नाही.
मृत्यूनंतर नातेवाईकांच्या संमतीने हे दान केले जाऊ शकते. मात्र, आपण जिवंत असतानाच नेत्रदानाची इच्छा व्यक्त करून कुटुंबाला याबद्दल माहिती देणे महत्त्वाचे आहे. भारतात अनेक सरकारी आणि खासगी नेत्रपेढ्या कार्यरत आहेत. ‘अंधत्वमुक्त भारत’ या संकल्पनेला प्रत्यक्षात आणण्यासाठी या संस्था कार्यरत आहेत. आपल्या नजीकच्या नेत्रपेढीचा संपर्क क्रमांक किंवा वेबसाइट शोधून आपण यासंबंधी अधिक माहिती मिळवू शकता. नेत्रदान हे खऱ्या अर्थाने एक ‘श्रेष्ठदान’ आहे. या दानामुळे अंध व्यक्तींना दृष्टी मिळते आणि त्यांना नव्याने जीवन जगण्याची संधी मिळते. आपण सर्वांनी या महान कार्यात सहभागी होण्याचा आणि इतरांनाही यासाठी प्रोत्साहित करण्याचा नेत्रदान दिवसाच्या निमित्ताने संकल्प करू या.
करू या संकल्प । करू नेत्रदान ।
जगाचे दर्शन । चक्षूहिना ॥
प्रा. अरुण बाबारावजी बुंदेले, अमरावती,भ्र.ध्व.:८०८७७४८६९
