वार्डातील किमान निम्म्या नागरिकांच्या स्वाक्षरी अर्जावर असल्यास वाईन शॉप बंद
रोशन मदनकर(उप संपादक)
ब्रह्मपुरी(दि. 31 मार्च):- कोणतेही वाईन शॉप, दारूचे दुकान, बिअर बार उघडण्यासाठी शासनाचे निकष आहेत. अगदी तसेच हे दुकान बंद करण्यासाठी देखील तितकेच कठोर नियम आहेत. केवळ आंदोलन करून, रास्ता रोको करून किंवा हिंसक मार्ग पत्करून एखादे दुकान बंद करवून घेता येत नाही.त्यासाठी रितसर कायदेशीर लढाही देता येतो. एखाद्या परिसरातील दारू दुकानामुळे नागरिकांना त्रास होत असेल तर त्याबाबत तक्रार कशी करता येईल याबाबतच्या नियम आहेत.
कारवाईचे नियम सामान्य नागरिकांना असणे खूप गरजेचे आहे. शाळेपासून शंभर मीटरच्या परिसरात असलेले दारू दुकान बंद करण्याचे अधिकार थेट जिल्हाधिकाऱ्यांना आहेत.प्रार्थनास्थळांजवळही दारू दुकानाला परवानगी नसते. परंतु दुकानाला परवाना मिळण्यापूर्वीच शाळा किंवा प्रार्थनास्थळ तेथे असणे आवश्यक आहे. तसेच ज्या वॉर्डात दारूचे दुकान आहे. त्याभागातील मतदार यादीत नावे असलेल्यांपैकी किमान निम्म्या नागरिकांच्या स्वाक्षरी अर्जावर असल्यास वाईन शॉपला बंद करता येतो. त्यानंतर स्वाक्षरींसह दुकान बंद करण्याबाबत जिल्हाधिकाऱ्यांकडे अर्ज करता येतो.
अर्ज प्राप्त झाल्यानंतर जिल्हाधिकारी राज्य उत्पादन शुल्क विभागाला खात्री करण्याचे आदेश देतात. त्यानुसार अधिकारी घरोघरी जाऊन संबंधित व्यक्तीनेच स्वाक्षरी केली आहे ना, याची खात्री करतात. खात्री झाल्यानंतर तसा अहवाल जिल्हाधिकाऱ्यांकडे पाठविण्यात येतो. त्यानंतर जिल्हाधिकारी मतदान प्रक्रिया घेण्याचे आदेश देतात.ज्या भागातील दारू दुकान बंद करायचे असेल त्या भागात महसूल यंत्रणा, ग्रामपंचायत, नगरपंचायत, नगरपालिका किंवा महापालिकेच्या मदतीने मतदान प्रक्रिया घेतली जाते.
मतमोजणीनंतर किती मते दारू दुकान बंद करण्याच्या बाजूने व किती विरोधात पडली याची मोजणी केली जाते. मतांच्या संख्येनुसार दुकान बंद करायचे किंवा ठेवायचे याबाबत जिल्हाधिकारी आदेश निर्गमित करतात.ही सर्व प्रक्रिया केल्यानंतरही अधिकारी दाद देत नसतील तर कोर्टात दाद मागता येते. कोर्टाच्या आदेशानुसार प्रशासनाला उपरोक्त प्रक्रिया पार पाडावीच लागते. नागरिकांनी पुढे टाकलेला पाऊल हा त्यांच्या पुढील पीढीकरिता महत्वाचा ठरू शकतो.
